أعواد كثيرة من محصول القصب على حواف أرض زراعية في نطاق مركز بيلا بمحافظة كفر الشيخ، زُرعت وتركها أصحابها إلى المارة كصدقة جارية، منتظرين الأجر والثواب من الله عز وجل، ودعوة من المارة.

منذ سنوات كثيرة زرع أحمد عطية الصاوي، صاحب الـ46 عاماً، وأفراد أسرته، «القصب» حول الأرض الزراعية، حتى يستفيد منه أفراد الأسرة، وأيضاً المارة من المزارعين المترددين على أراضيهم.

«الصاوي»: مش عايزين من الناس غير دعوة حلوة

«القصب المزروع ده كان عبارة عن تقاوي جاية من الصعيد صاحب ابن عمي بعتها له هدية»، من هنا بدأت الحكاية التي يرويها «الصاوي» لـ«الوطن»: «وزرعناها في الأرض، ومن وقت ما زرعنا القصب وبقى يطلع قررنا إننا مش هنبيعه وهيكون كله لله، يعني أي حد بيعدي من على الأرض ينزل ياكل وياخد كمان اللي هو عاوزه، ومش عايزين منه غير دعوة حلوة».

يحرص «الصاوي» على إهداء القصب إلى كل أصدقائه وأيضاً معارفه ومن يطلب: «دايماً بنهادي حبايبنا بالقصب، وأي حد عايز بييجي ياخد اللي هو عايزه، وبدون أي مقابل، رغم إنّ القصب سعره عالي، إلا إننا وهبنا ده لله، يكفي إنّ الناس تبقى سعيدة ومبسوطة وكمان الأطفال الصغيرين بيفرحوا جداً بالقصب».

عقب الانتهاء من إزالة القصب من حواف الأرض الزراعية تبدأ الاستعدادات لدورة جديدة من القصب: «لما القصب بيخلص والكل يتراضى منه، بنبدأ نستعد لدورة جديدة لأنه هو بيطلع كل سنة لوحده لأننا لما بنيجى نقطع العود من الأرض بنسيب الجدر في الأرض زى ما هو علشان يطلع تاني، وحقيقي الواحد بيكون فرحان وسعيد والقصب بيطلع علشان فرحة الناس اللي هتاكله».

منح الجوافة المجانية إلى المارة والمزارعين

بجانب القصب تحرص أسرة «الصاوى» أيضاً على منح الجوافة المجانية إلى المارة والمزارعين: «بخلاف القصب فيه كمان شجر جوافة مزروع حوالين الأرض، وبردو متاح لأي حد يقطف وياكل، ده رزق ربنا لعباده وإحنا مجرد أسباب، وربنا يتقبل مننا».