أعلن محمد صافي المذيع الداخلي بإستاد القاهرة اعتزاله التواجد في الملعب وذلك بعد إهانة والدته خلال مباراة الأهلي وجورماهيا الكيني في دوري أبطال أفريقيا، ويستعرض موقع تحيا مصر التفاصيل.

رسالة محمد صافي

وقال محمد صافي في بداية رسالته، أنا أسف يا أمي، الأسبوع اللي فات في حفل تسليم درع الدوري، تم سبّي بالأم (الأهلاوية جدا جدا على فكرة) من قبل "بعض" الجماهير، ولم أعلم هذا إلا اليوم اللي بعده لما الفيديوهات اتبعتتلي.

وتابع محمد صافي، لو كنت سمعت السباب في أرض الملعب كنت سلمت المايك ومشيت احتراما لأمي ولنفسي ولمهنتي، متفهم أكيد إن الجمهور كان عاوز يهتف ويشجع، حقهم ١٠٠٪ وبالنسبالهم الصوت كان عالي والأغاني كانت مدايقاهم فشتموني أنا بالأم وأنا بسميهم "أعظم جمهور في الكون". 

وأشار محمد صافي، عمري ما أزعل من أطفال من دور أولادي انساقوا وراء هتاف، لكن مش عارف اتخطى منظر اللعيبة في الملعب وهما بيضحكوا، منهم نفس اللعيبة اللي دافعت عن غريمهم لما اتشتم بحرقة كبيرة ولم يفكروا في الدفاع عن راجل غلبان ابن ناديهم ضحى بالكثير ليكون هناك لإعلانهم "أبطال"، لعيبة كنت اتشرف بإعلان أساميهم في محافل دولية كثيرة.

محمد صافي مذيع ستاد القاهرة

وأردف محمد صافي، مش قادر أوصفلكم صعوبة المكالمة وأنا بكلم أمي بعتذرلها إن شغلي جابلها الشتيمة القذرة بهذا الشكل، قالتلي "ربنا يسامحهم يا إبني ويديهم على قد نيتهم"، أشكر كل من اعتذر لي على تيك توك ومنصات اخرى واعتذارهم فوق راسي ليوم الدين، لكن مش عارف اتخطى اللعيبة اللي كانت بتضحك، مع ان سهل جدا إنك كنت تشاور للجمهور "لا". 

واستكمل محمد صافي، كان صعب جدا إني اتكلم في الموضوع ده قبل ماتش السوبر تفاديا لأي لغط ممكن يحصل، لكن بعد ماتش إمبارح قررت ازالة الثقل ده من على صدري، لذلك قررت اعتزال جميع اشكال الإذاعة الداخلية لكرة القدم المصرية المحلية. 

وأشار محمد صافي، ساكتفي بإعلان تسليم النادي اللي بعشقه منذ الطفولة واللي هفضل أشجعه لحد ما اموت، ٢ بطولة أفريقيا منهم نهائي القرن ودرع الدوري، وتحت أمر الدولة في أي محافل رياضية غير كرة القدم، لأني لن أستطيع الاحتفال بأسماء من ضحك على سباب امي، بالظبط زي ما عرفتش احتفل باسم لاعب متحرش في بطولة افريقيا ٢٠١٩، لن أستطيع ان انافق نفسي.

واختتم محمد صافي، وإيماناً بدوري المجتمعي، سأعكف على تمرين جيل جديد من المذيعين الداخليين لإكمال مسيرة بدأتها من ٢٠١٩ هدفها الارتقاء بمهنة الاذاعة الداخلية في مصر و وضعها في المكانة اللي تستاهلها، و تاني تحت امر الدولة في أي محفل رياضي غير كروي، و افتخر بكل الشغل اللي اشتغلته و شاكر جدا للفرصة اللي اتيحت لي، وبعتذر للجمهور اللي كان موجود في الاستاد، حتى اللي سبوني بالأم بدون وجه حق، أو أي حد زعل من شغلي، حقيقي أنا اسف ليكم، اتعلمت زمان إنك لن ترضي الجميع، فارضي ضميرك في شغلك و ده اقصى استطاعتك، وحقيقي هارد لك لعيبة الاهلي على خسارة السوبر، هفضل اشجع الكيان لحد ما اموت مهماً كان وتواضعوا يرحمكم الله، وشكرا لجمهور مصر العظيم على كل الذكريات الجميلة، وأراكم في محافل قادمة ان شاء الله وحقك عليا يا أمي.